Cidade Vaticano, 08.05.2025
Dame horik ho imi hotu!
Maun-alin no inan-feton doben sira, ida ne’e mak cumprimento dahuluk husi Cristo be Moris-hi’as, Bibi-atan Di’ak, be fo Nia moris ba Maromak nia bibi sira. ha’u mos hakarak atu cumprimento dame nian ne’e bele tama iha imi nia fuan, to’o ba imi nia família sira, ema hot-hotu, iha nebé de’it, povo hot-hotu, rai hot-hotu. Dame horik ho imi!
Ida ne’e mak Cristo Moris-hi’as nia dame, dame ida be la ho arma, haraik-an no metin. Mai husi Maromak, Maromak be hadomi ita hotu incondicionalmente.
Ita sei rai nafatin iha ita nia tilun Papa Francisco nia lian be fraco maibé sempre fó coragem, nia be haraik bênção ba Roma, haraik bênção mos ba mundo, ba mundo tomak, iha dadér loron Páscoa nian. Ha’u mos hakarak haraik bênção ida ne’e: Maromak hadomi ita, Maromak hadomi ita hotu, no buat aat sei la ukun! Ita hot-hotu iha Maromak nia liman. Tanba ne’e, keta tauk, hamutuk fo liman ba malu ho Maromak no entre ita no la’o ba oin nafatin! Ita nu’udar Cristo nia discípulo; Cristo la’o iha ita nia oin.; mundo precisa Nia roman. Humanidade precisa Nia nu’udar ponte atu ba to’o Maromak no Nia domin. Imi mos tulun malu ba, atu ida-idak bele harí ponte, liu husi diálogo, encontro, ita hotu hamutuk atu sai povo ida de’it iha dame. Obrigado ba Papa Francisco!
Ha’u hakarak agradece mos ha’u nia maun-alin Cardeal sira nebé hili ona ha’u atu sai Sucessor Pedro nian no la’o hamutuk ho imi, hanesan Igreja ida de’it be sempre buka dame, justiça, buka bebeik atu serviço nu’udar ema nebé fiel ba Jesus Cristo, la tauk, atu haklaken Evangelho, atu sai missionário.
Ha’u nu’udar Santo Agostinho (agostiniano), nia nebé dehan: “Ho imi, ha’u nu’udar cristão no ba imi nu’udar bispo”. Iha sentido ida ne’e mak ita hotu sei lao hamutuk ba pátria ida nebé Maromak prepara tiha ona mai ita.
Ba Igreja Roma nian, saudação especial! Ita tem que buka hamutuk oinsá atu sai Igreja ida nebé missionária, Igreja ida nebé harí ponte, diálogo, sempre nakloke atu simu, hanesan praça ida ne’e, ho liman nakloke ba hot-hotu, ema hotu nebé precisa ita nia caridade, ita nia presença, diálogo no domin.
Ha’u husu licença ba imi atu cumprimenta mos ha’u nia diocese Chiclayo, iha Perú, nebé nia povo sira fiel hodi acompanha sira nia bispo, partilha sira nia fiar no fó buat barak tebes, atu continua sai nafatin Igreja nebé fiel ba Jesus Cristo.
Ba imi hot-hotu, maun-alin no inan-feton sira iha Roma, iha Itália, no mundo tomak: ita hotu hakarak sai Igreja Sinodal, Igreja ida nebé la’o, Igreja ida nebé sempre buka dame, be buka nafatin caridade, be buka nafatin atu besik ba ema hirak be terus.
Ohin ne’e nu’udar loron Nain Feto Pompei nian. Ita nia Inan Maria sempre hakarak atu lao ho ita, besik ita, tulun ita ho nia intercessão no nia domin. Tanba ne’e ha’u hakarak reza hamutuk ho imi. Ita reza hamutuk ba missão foun ida ne’e, ba Igreja hotu, ba dame iha mundo no ita husu graça especial ida ne’e ba Maria, ita Inan: Ave Maria …
[Bênção solene “Urbi et Orbi”]
Traduz husi: Zeferino Mesquita Almeida
Add comment
Comments