AMU PAPA LEÃO XIV NIA HOMILIA IHA JUBILEU BA FAMÍLIA, LABARIK NO FERIK-KATUAS SIRA

           Ne’e duni, Cristo husu atu ita hotu “sai ida de’it” (v. 21) ida ne’e mak buat di’ak loloos ida be ita hotu hakarak, basá união universal ida ne’e harí liu husi criatura sira nia comunhão rohan-laek ho Maromak nia domin, nu’udar Aman be haraik moris, Oan be simu no Espírito be fahe.

           Na’i Maromak lakohi atu ita hamutuk maibé fahe ba grupo keta-ketak, hanesan parte keta-ketak be la iha naran, maibé Nia hakarak atu ita sai ida de’it: “nu’udar ita, Aman, ita ho Ha’u no Ha’u ho ita, atu sira mos sai ida de’it hanesan Ita” (v. 21). Unidade ida be Jesus husu ne’e, nu’udar comunhão ida be harí iha sasukat domin be Maromak rasik hadomi, ida be haraik moris no salvação mai mundo. Tamba ne’e, ida ne’e uluk liu nu’udar dom be Jesus lori mai. Liu duni husi Nia fuan ida ema nian ne’e mak Maromak Oan husu ba Aman Maromak dehan: “Ha’u ho sira no Ita ho Ha’u, atu sira bele sai perfeito iha unidade no mundo bele hatene katak Ita mak haruka Ha’u mai no Ita hadomi sira hanesan Ita hadomi Ha’u” (v. 23).

           Mai ita rona liafuan hirak ne’e ho admiração: Jesus hatudu hela mai ita katak Maromak hadomi ita hanesan hadomi Nia an. Aman Maromak la hadomi ita menos liu husi Nia domin ba Nia Oan-mane mesak, katak la iha rohan. Maromak la hadomi menos, basá Nia mak hadomi uluk, ida be hadomi uluk ita! Jesus rasik sai sasin wainhira dehan ba Aman Maromak: “Ita hadomi ha’u molok mundo hahú” (v. 24). No nune’e duni: iha Nia laran-luak, Maromak hakarak nafatin atu dada ema hotu ba hamutuk ho Nia, tamba moris ne’e Ninian, haraik mai ita liu husi Cristo, be halo ita sai ida de’it, halo ita hotu hamutuk.

           Wainhira rona Evangelho ida ne’e iha Jubileu ba família sira no labarik sira, ferik no katuas sira, halo ita hotu nakonu ho ksolok.

           Belun sira, ita simu moris ne’e molok ita rasik hakarak. Hanesan Papa Francisco hanorin “ita hot-hotu nu’udar oan, maibé ita rasik nunca hili atu moris” (Angelus, 1.1.2025). Laos de’it ida ne’e. Ita moris tiha, ita sei precisa tan ema seluk atu moris, mesak de’it karik ita sei labele moris: ema seluk ida mak salva ita, tau-matan mai ita, mai ita nia isin no mos ba ita nia klamar. Ita hot-hotu moris, tanba ne’e, agradece ba relação, eh bele dehan, agradece ba vínculo livre no libertador ema nian no ema nia tulun malu.

           Loos duni katak, dalaruma ita hetan traição. Exemplo, dalaruma husu liberdade la’os atu haraik moris maibé par halakon/hasai moris, laos atu tulun maibé atu halo aat. Biar nune’e, maske iha buat aat hirak be halo fahe-malu no oho-malu, Jesus harohan nafatin ba Aman Maromak mai ita, no Nia harohan sira sai nu’udar aimoruk ida ba ita nia kanek sira, haklaken perdão no reconciliação ba ema hot-hotu. Na’i nia harohan ida ne’e fo sentido nakonu mai ita nia momento naroman sira wainhira ita hadomi malu, nu’udar inan-aman, avô no oan sira. Ida ne’e mak ita hakarak haklaken ba mundo: ita iha ne’e atu sai “ida de’it” hanesan Maromak hakarak ita “ida de’it”, iha ita nia família be ita horik ba, iha ita nia serviço no estudo: keta-ketak, maibé ida de’it; barak, maibé sempre ida de’it, iha circunstância hot-hotu no iha etapa sira moris nian.

           Belun sira, ita hadomi malu nune’e karik, hatu’ur iha abut mak Cristo, be nu’udar “Alfa no Omega”, “uluk no ikus” (cfr. Ap. 22,13), ita sei sai sinál dame nian ba ema hotu, iha sociedade no iha mundo. No keta haluha: liu husi família mak hahoris povo ida nia futuro.

           Iha tempo sira ikus ne’e ita simu sinál hirak be halo ita sente ksolok no iha tempo hanesan halo mos ita reflete: ha’u refere ba Beato no Santo hirak ikus-ikus be moris nu’udar kaben-nain, no la fahe-malu, maibé hamutuk, be simu ona sacramento kaben. Hanesan Luís ho Zélia Martin - Santa Teresinha do Menino Jesus nia inan-aman; no mos Beato Luís no Beata Maria Beltrame Quattrocchi, be hala’o sira nia moris kaben-nain nian iha duni Roma iha século ida liu ba. Ita keta haluha mos família husi rai Polaco, Ulma: inan-aman ho oan sira hamutuk to’o sai mártir. Ohin ha’u dehan katak ida ne’e nu’udar sinal ida be ita precisa reflete. Loos duni katak, sira nu’udar sasin exemplar ba moris kaben-nain nian, Igreja hanorin ita katak mundo ohin loron precisa aliança conjugal atu hatene no simu Maromak nia Domin no haboot liu tan, liu husi nia kbi’it atu tau-hamutuk no reconcilia, iha relação no sociedade.

           Tamba ne’e, ho fuan be nakonu ho gratidão no esperança, ha’u hakarak dehan ba imi kaben-nain sira: matrimónio ne’e bele la ideal ba, maibé ukunfuan husi domin loloos ne’e mak entre ema mane ida no feto ida; domin total, fiel no fo fuan (cfr. São Paulo VI, Carta Encíclica Humanae Vitae, 9). Domin ida ne’e duni mak muda imi sai isin ida de’it, halo imi bele sai Maromak nia lalatak hodi haraik moris.

           Tamba ne’e duni mak ha’u hakarak atu encoraja imi atu sai exemplo coerência ba imi nia oan sira, imi comporta hanesan saida mak imi hakarak sira atu comporta, hanorin sira atu hetan liberdade liu husi obediência, buka nafatin dalan atu aumenta buat di’ak hirak be sira iha ona. No ba imi, oan sira, agradece ba imi nia inan-aman sira: dehan “Obrigado” ba dom moris nian no dom sira seluk be ita simu loro-loron ne’e nu’udar hahalok dahuluk ida nebé hatudu ita nia honra ba inan no aman (cfr. Ex. 20,12). Ikus liu, ba imi, katuas no ferik sira, ha’u husu ba imi atu tau-matan ba ema hirak be imi hadomi, ho matenek no laran-luak, ho haraik-an no paciência be imi liu ona iha tinan barak nia laran.

           Fiar ne’e transmite liu husi geração ida ba geração seluk iha família nia laran, hamutuk ho moris: fahe liu husi hahán be iha mesa leten ho afeto no ho fuan. Husi nebá mak bele sai nu’udar fatin kmo’ok ida atu hasoru Jesus, be hadomi ita no hakarak nafatin di’ak mai ita.

           Ha’u hakarak aumenta tan buat ikus ida. Maromak Oan nia harohan, be haraik esperança mai ita iha ita nia dalan, fo hanoin mos mai ita ka loro ida ita sei sai uno unum “ida de’it” (cfr. S. Agostinho, Sermo Super Ps., 127): sai ida de’it iha Salvador ida de’it, be hakoak husi Maromak nia Domin rohan-laek. Laos ita de’it, maibé inan-aman sira, avô sira, maun-alin sira, oan sira, nebé la’o uluk tiha ona ba Páscoa rohan-laek no ita sei sente sira nia presença iha ne’e, hamutuk ho ita, iha celebração ida ne’e.

Texto original: https://www.vatican.va/content/leo-xiv/it/homilies/2025/documents/20250601-omelia-giubileo-famiglie.html

Traduz husi: Zeferino Mesquita Almeida