AUDIÊNCIA GERAL – PAPA LEÃO XIV (04.06.2025)

       Maun-alin no bin-feton doben sira,

      Ohin ha’u hakarak ko’alia nafatin kona ba Jesus nia aiknanoik ida. Iha aiknanoik ida ne’e mos sei ko’alia nafatin kona ba história be atu haburas ita nia esperança. Tamba dalaruma ita iha impressão katak ita la consegue hetan sentido ida ba ita nia moris: ita sente la folin, la adequado, hanesan los serviço-nain sira be hein hela iha mercado nia rohan sira, hein hela atu ema ruma bolu netik sira ba serviço. Maibé dalaruma tempo lao ba oin, moris mos ba oin no ita la sente ema ruma reconhece eh aprecia ita. Eh dalaruma ita nia tempo mak seidauk to’o, ema ruma mak bá uluk tiha ita, eh dalaruma ita nia preocupação mak kaer metin hela ita iha fatin ruma.

Metáfora ida mercado nia rohan sira ne’e sei kona hela mos mai ita nia tempo ohin loron, tamba mercado nu’udar fatin atu halo negócio, nebé infelizmente ema fa’an no sosa mos domin ho dignidade, buka atu manán buat ruma. No wainhira ema ida sente la folin, sente ema la reconhece, halo nia bele foti dalan atu fo nia an ba ema ida nebé mai husu uluk. Maibé Maromak fo hanoin mai ita katak ita nia moris ne’e folin, no Nia hakarak atu tulun ita hodi descobre.

Iha aiknanoik ida be ohin ita hakarak haktuir ne’e mos ko’alia kona ba serviço-nain sira be hein hela ema ruma atu mai bolu sira ba serviço loron ida nian. Ita ko’alia kona ba capítulo 20 husi Evangelho Mateus nian no ita hetan ema ida nebé ho nia hahalok la bai-bain, nia hakfodak no husu. Nia mak to’os-uvas nia nain, nia rasik mak sai hodi ba buka serviço-nain sira. Ne’e katak nia hakarak harí duni relação pessoal ida ho sira.

      Hanesan ohin ha’u dehan ona, ne’e atu haktuir aiknanoik ida be fo esperança, tamba ita rona katak nia sai dala barak hodi ba buka ema hirak be hein hela ne’e, hodi fo sentido ida ba sira nia moris. To’os-uvas nia nain ne’e sai madrugada no cada horas tolu nia sempre buka serviço-nain sira atu haruka ba serviço iha nia to’os-uvas. No ho esquema ida ne’e, wainhira nia sai tiha iha tuku tolu loro-kraik, la precisa tan ona atu sai ba buka, basá tempo serviço nian ne’e sei remata iha tuku neen.

      Maibé to’os nain be la hatene kole ne’e - nebé hakarak fo folin ba ema seluk nia moris - nia sei sai tan iha tuku lima. Serviço-nain hirak be hein hela iha mercado nia rohan ne’e dalaruma lakon tan tiha ona esperança. Nu’udar loron ida be la di’ak ba sira. Maibé sei iha ema ida be fiar hela sira. Bolu serviço-nain sira iha horas ikus ne’e atu hatudu sentido saida? Bá serviço de’it horas ida ne’e atu hatudu sentido saida? Maibé, maske wainhira ita sente katak halo buat uitoan de’it iha moris ne’e mos sei folin nafatin. Iha nafatin possibilidade atu hetan sentido ida, basá Maromak hadomi ita nia moris.

      No iha ne’e mak ita bele haré mos originalidade husi to’os-nain ne’e iha loro-kraik, wainhira atu selu sira be mai serviço. Ba hirak be mai husi kedas madrugada ne’e, nia selu ho osan-mutin ida, nu’udar folin ba loron tomak serviço nian ne’e. No ba sira seluk mos nia fo hanesan. Ida ne’e mak aiknanoik ne’e hakarak provoca ita: ida nebé mak justo? Ba to’os-nain ne’e (katak ba Maromak), justo ne’e mak wainhira ema ida-idak hetan buat be natoon ba nia atu moris. Nia bolu rasik duni serviço-nain sira, Nia conhece sira nia dignidade no baseia ba ida ne’e mak nia hakarak selu sira. No Nia fo ba hot-hotu osan be hanesan.

      Iha aiknanoik haktuir dehan ema hirak be to’o uluk mai ne’e sente laran-moras: sira la consegue haré to’os-nain nia hahalok kmo’ok ne’e, nebé la justo, maibé laran-luak, la haré de’it ba mérito maibé mos ba necessidade. Maromak hakarak fo Nia Reino ba ema hot-hotu, katak moris be nakonu, rohan-laek no ksolok. No Jesus halo duni nune’e ho ita: Nia la halo classificação, Nia fo Nia an tomak ba hirak be loke fuan!

      Liu husi aiknanoik ohin nian, ema sarani sira bele monu ba tentação atu hanoin nune’e: “nusa mak hahú serviço uluk? Karik depois ita simu osan hanesan, tanba sá mak serviço barak?”. Ba mahusuk ida ne’e, Santo Agostinho hatán nune’e: “O hatene hela nia sei selu hira maibé o la hatene loron saida, tanba sá mak hakarak tarde atu tuir nia be bolu o? atenção atu labele dada-an, tanba de’it o nia incerteza, buat nebé nia fo ba o baseia ba saida mak nia promete ona” (Discurso 87, 6, 8).

      Ha’u hakarak dehan especial ba foin-sa’e sira, atu labele hein, maibé hatán ho laran-ksolok ba Na’i be bolu ita atu bá serviço iha Nia to’os. Keta tarde, lulun faru-liman, basá Na’i Maromak ne’e laran-luak no o sei la laran-moras! Wainhira serviço iha Nia to’os, o sei hetan resposta ba mahusuk todan hirak be halo todan iha o nia an: ha’u nia moris nia sentido ne’e mak saida?

      Maun-alin no bin-feton doben sira, ketan laran taridu! Maske iha momento nakukun sira moris nian, wainhira tempo lao ba oin no la fo hela resposta ba buat be ita buka, ita husu ba Na’i Maromak atu sai mai hamutuk ho ita iha nebé de’it ita hein Nia. Maromak ne’e laran-luak no Nia sei mai!

[Santo Padre cumprimenta peregrino sira husi rai no lian oi-oin]

Texto Original:

https://www.vatican.va/content/leo-xiv/it/audiences/2025/documents/20250604-udienza-generale.html

Traduz husi: Zeferino Mesquita Almeida