VIGÍLIA HO PEREGRINO SIRA IHA JUBILEU BA ESPIRITUALIDADE MARIANA NIAN

Maun-alin no feton doben sira,

kalan ne’e, hamutuk ho Maria, Jesus nia Inan, ita hamutuk iha oração, hanesan mos sarani dahuluk sira halo iha Jerusalém (cf. Act 1,14). Hot-hotu hamutuk, neon-metin no ida de’it, ita la kole atu husu dame, Maromak nia dom nebé ita tenke manán no sai ita nia compromisso.

Espiritualidade mariana nebé autêntica

Iha Jubileu espiritualidade mariana nian ida ne’e, ita nia matan sarani nian buka guia ida ba ita nia peregrinação esperança ne’e iha Virgem Maria, hanoin nia virtude nu’udar ema no envagélica, imita tuir nia mak sai nu’udar devoção mariana nebé autêntica liu (cf. Conc. Ecum. Vaticano II, Const. dogm. Lumen gentium, 65.67). Hanesan Maria, nu’udar sarani dahuluk, ita mos hakarak sai hanesan knotak ida nebé bali Ida be Aas liu hotu, «horik-fatin haraik-an ba Na’i, tanba de’it simu Espírito nia iis» (S. João Paulo II, Angelus, 15 agosto 1988). Hanesan Maria, discípula dahuluk, ita mos husu dom ho fuan nebé rona no sai universo nia rohan nebé hatene simu. Liu husi Maria, Feto terus-nain, forte, fiel, ita reza atu Na’i haraik mai ita dom laran-luan ba ita nia maun-alin no feton sira nebé terus no ba criatura sira hotu.

Ita hateke ba Jesus nia Inan ho feto kbi’it-nain hirak be hamutuk iha Cruz hun, atu ita mos aprende atu hela metin hanesan sira, iha cruz oioin sira iha mundo ne’e nia hun, nebé Cristo sei hedi ba iha maun-alin sira, atu lori fuan-hakmatek, comunhão no tulun ba sira. Mai ita reconhece ita nia maun-alin no feton sira iha Maria, nia be nu’u humanidade nia inan no ita dehan ba nia, ho poeta ida nia liafuan:

«Inan, itaboot nu’udar feto ida be simu domin;

Inan, itaboot nu’udar inan ida be tanis

tan nia ona mate, oan be ema trai.

Oan hirak ne’e sei la para atu oho» (D. M. Turoldo).

Inan Páscoa nian, ami harohan ba itaboot nia proteção, hamutuk ho ema hotu be nafatin simu Ita Oan nia terus.

Imi halo tuir buat hotu be Nia dehan ba imi

Iha Jubileu espiritualidade mariana nian ne’e, ita nia esperança hetan roman husi roman hakmatek no perseverante husi Maria nia liafuan nebé Evangelho hato’o mai ita. Hirak ne’e hotu, ida be folin boot liu mak hato’o iha festa kaben Caná nian, wainhira Maria hatudu ba Jesus no dehan ba servente sira: «Imi halo tuir buat hotu be Nia dehan ba imi!» (Jo 2,5). Liu tiha ne’e, Maria la ko’alia tan ona. Tanba ne’e, liafuan hirak ne’e atu sai tiha nu’udar testamento, nebé oan hot-hotu tenke hadomi, hanesan mos testamento husi inan sira seluk.

Buat hotu be Nia dehan ba imi. Maria iha certeza ida katak Jesus sei ko’alia, no Nia Liafuan la hotu de’it maibé sei cria, hahoris, hala’o, hakonu mundo ho buat kmo’ok no kmanek festa nian ho tua. Maria, hanesan sinal ida be hatudu dalan, lori ba buat ida nebé aas liu nia an, hatudu katak dalan ikus mak Na’i Jesus no Nia Futar-Liafuan, centro husi buat hotu atu to’o ba, eixo ida nebé tempo ho eternidade hale’u ba.

Maria recomenda atu halo tuir Nia Liafuan. Halo tuir Evangelho, muda sai nu’udar gesto no isin, ran no isin, esforço no hamnasa. Halo tuir Evangelho, no moris sei muda, husi mamuk ba nakonu, husi nakukun ba naroman.

Halo tuir buat hotu be Nia dehan ba imi: Evangelho hotu, liafuan exigente, laran-ma’us nebé consola, hanorin no hako’ak. Buat hirak be imi compreende no mos ida be imi la compreende. Maria dehan mai ita atu sai nu’udar profeta: atu keta husik Nia Liafuan sira monu leet de’it (cf. 1Sm 3,19).

No husi Jesus nia liafuan sira be ita lakohi atu monu leet de’it, iha mos lian balu particular los iha ohon loron, iha vigília oração ba dame ida ne’e: liafuan be hato’o ba Pedro iha to’os ai-oliveira laran: «hatama surik ba nia knu’uk» (cf. Jo 18,11). Desarma liman sira, maibé liliu mak fuan. Hanesan ha’u dehan antes ona, dame nebé desarmada no desarmante (la ho arma/kilat). La’os atu convence ema seluk hodi la halo buat ruma (dissuasão), maibé fraternidade; la’os ultimato, maibé diálogo. La’os mai ho resultado katak manán hasoru inimigo, maibé ho resultado disseminasão justiça no perdão ho aten-brani.

Hatama surik ba nia knu’uk ne’e nu’udar liafuan nebé hakarak hato’o ba ema kbi’it-nain sira iha mundo, ba ema hirak be kaer hela povo seluk nia destino: atan-brani ba atu rai arma (desarma)! Nune’e mos, mai ita hotu, atu ita bele consciente katak ita labele oho ideia, fiar eh política ida. Ida dahuluk atu desarma ne’e mak fuan, basá karik la iha dame iha ita nia an, ita sei la fo dame.

Entre imi labele hanesan ne’e

Ita rona nafatin Na’i Jesus: ema boot sira iha mundo ne’e harí império sira ho kbi’it no osan (cf. Mt 20,25; Mc 10,42), «entre imi, labele hanesan ne’e» (Lc 22,26). Maromak la halo hanesan ne’e: Mestre la tur iha trono, maibé hakfolik hena ida no hakne’ak iha ema seluk nia ain. Nia império mak fatin ki’ik natoon atu fase nia belun sira nia ain no tau-matan ba sira.

Ida ne’e nu’udar convite atu halo tuir perspetiva nebé diferente, atu ikus mai bele haré mundo ne’e husi kraik, ho matan ema terus sira nian, la’os ho matan ema boot sira nian; considera história ho ema ki’ik sira, la’os ho sira kbi’it-nain; sani acontecimento sira iha história ne’e hahú ho faluk nia matan, oan-kiak, la’o-rai, labarik be kanek, sai husi uma, halai lakon, hirak ne’e nia matan. Ho hirak be hakur tasi, Lázaro be kiak, hein iha rico boot nia odamatan oin, hirak ne’e nia matan. La halo ida ne’e karik, buat ida sei la muda, tempo foun, justiça no dame sei la mosu mai.

Virgem Maria mos halo ida ne’e iha knananuk Magnificat, wainhira nia hateke metin ba buat rahun sira be humanidade halo, nebé hatudu mundo be muda-an iha contraste entre ema haraik-an ho kbi’it-nain sira, entre ema kiak no rico sira, entre hamlaha no bosu. No nia hili sira be ki’ik, hamutuk ho sira be ki’ik liu iha história ne’e nia sorin, atu hanorin ita hanoin katak, ho Maria, mehi ba lalehan foun no rai foun ida.

Ksolok ba imi

Imi halo tuir buat hotu be Nia dehan ba imi. No ita compromete ba ita an atu halo iha ita nia isin no paixão, história no ação, Maromak nia Liafuan boot: «ksolok ba hirak be lori dame» (cf. Mt 5,9).

Ksolok ba imi: Maromak fo ksolok ba ema hirak be produz domin iha mundo, ksolok ba hirak nebé em vez de manán inimigo, prefere atu dame ho inimigo.

Aten-brani, la’o ba oin, imi be cria condição ba futuro dame nian, iha justiça no perdão; laran-maus no brani ba, keta laran-taridu. Dame ne’e dalan ida nebé Maromak la’o ho imi. Na’i halo no fahe dame liu husi Nia belun lori dame sira iha fuan, atu to’o nia tempo bele sai dame nain, istrumento husi Nia damen.

Ohin ita hamutuk hotu iha ne’e hodi harohan ba Maria, Jesus nia Inan no ita nia Inan, hanesan discípulo dahuluk sira iha cenáculo. Ba nia, feto dame-nain be kle’an, liurai-feto dame nian, ita husu:

harohan ho ami, Feto fiel, Liafuan nia knotak lulik.

Hanorin ami atu rona kiak sira no inan Rai nia halerik,

 matan-moris ba Espírito nia apelo sira iha fuan nia segredo,

iha maun-alin sira nia moris, iha acontecimento sira iha história,

iha terus no ksolok nu’udar criação.

Santa Maria, ema moris sira nia inan,

inan kbi’it-nain, terus-nain, fiel,

Virgem esposa be iha Cruz hun

Nebé domin sai loloos no moris mosu mai,

atu Itaboot sai nu’udar ami nia compromisso atu serví.

Hanorin ami atu horik ho ita iha cruz bar-barak nia hun

Nebé Ita Oan sei hedi hela ba,

nebé moris sei sente ameaçada makás;

atu moris no sai sasin domin Cristo nian

simu nu’udar maun-alin iha ema hotu;

atu husik tiha egoísmo nebé la loos

atu tuir Cristo, ema nia roman loloos.

Virgem dame nian, odamatan esperança nian be seguro,

simu ita oan sira nia harohan!

Texto Original:

https://www.vatican.va/content/leo-xiv/it/speeches/2025/october/documents/20251011-veglia-di-preghiera.html

Traduz husi: Zeferino Mesquita Almeida

Kona ba "Timor oan - Maromak oan"