[TETUN] AUDIÊNCIA JUBILAR (04.10.2025)

     Maun-alin no bin-feton doben sira, bom dia no bem-vindo ba hot-hotu!

     Iha texto bíblico nebé ita foin rona ne’e (Lc 16,13-14), Evangelista haktuir katak ema balun nebé wainhira rona tiha Jesus, sira hahú hamnasa Nia. Sira sente katak Jesus nia discurso kona ba kiak ne’e la tama sira nia kakutak. Bele dehan katak, sira sente laran monu liu ba kan osan nian.

     Belun doben sira, imi mai nu’udar peregrino esperança nian, no Jubileu ne’e nu’udar tempo esperança nebé concreto, nebé ita nia fuan bele hetan perdão no laran-luak, ikus mai buat hotu bele hahú fila-fali ho dalan foun. Jubileu loke mos esperança ba distribuição rikusoin nebé oin seluk, ba possibilidade katak rai ne’e ema hotu nian, basá buat nebé oras ne’e hatudu ne’e la la’o nune’e. Iha tinan ida ne’e ita tenke hili se mak ita atu serví, justiça ka injustiça, Maromak ka osan.

     Hein ne’e katak hili. Ida ne’e pelo menos bele dehan buat rua. Ida nebé ita bele hatene mak mundo ne’e sei muda wainhira ita mos muda-an. Peregrinação ne’e hala’o atu hetan ida ne’e, nu’udar escolha ida. Hakat Odamatan Santa ne’e atu bele tama iha tempo foun ida. Significado daruak ne’e kle’an no delicado liu: hein ne’e katak hili basá se mak la hatene hili ne’e sei lakon esperança. Consequência ida nebé comum los iha espiritualidade be mukit ne’e mak acídia (baruk-tén espiritual), katak la hatene atu hili buat ida. Então, se mak koko ida ne’e katak baruk-tén interior ne’e manán tiha ona nia, no ida ne’e aat liu fali mate. Maibé, hein ne’e katak (hatene) hili.

     Ohin ha’u hakarak ko’alia kona ba feto ida nebé ho Maromak nia graça, nia hatene atu hili. Feto-klosan ida be aten-brani no hasouru desafio: Clara de Assis. No ha’u haksolok atu ko’alia kona ba nia iha duni loron festa dedica ba São Francisco. Ita hatene katak, Francisco, hili moris kiak Evangelho nian, nia tenke fahe-malu mos ho nia família. Maibé nia mane ida: hetan duni escândalo, maibé ki’ik. Clara nia decisão fali fo resultado nebé impressionante liu tan: feto-klosan ida nebé hakarak sai hanesan Francisco, hakarak moris hanesan feto ida nebé livre hanesan ho (Francisco nia) maun-alin hirak ne’e!

     Clara compreende tiha ona saida mak Evangelho husu. Maske iha cidade nebé fiar cristão ne’e buras, maibé moris tuir Evangelho ho sério duni ne’e sai fali hanesan revolução ida. Então, hanesan mos ohin, ita tenke hili! Clara hili tiha ona, no ida ne’e fo esperança nebé boot mai ita. Tuir mai, ita haré consequência husi nia aten-brani atu tuir nia hakaran ne’e: ida uluk mak, feto-klosan barak husi território nebá hetan mos aten-brani hodi hili Jesus nia moris-kiak, moris Bem-aventurança; consequência daruak mak, dalan moris ida ne’e la hotu lalais kedas iha tempo nebá, maibé dura ba nafatin, to’o ita nia tempo. Clara nia opção ida ne’e inspira opção vocacional sira iha mundo tomak no continua nafatin nune’e to’o ohin loron.

     Jesus dehan: la bele serví ba na’i nain-rua. Nune’e mos Igreja sei jovem no dada foinsa’e barak. Clara de Assis fo hanoin mai ita katak foinsa’e sira gosta Evangelho. Sei nafatin nune’e: foinsa’e sira gosta ema hirak be hili tiha ona no lori nafatin consequência husi sira nia opção ne’e. No ida ne’e halo ema seluk mos hakarak atu hili. Ida ne’e nu’udar imitação santa ida: keta sai “fotocopia”, maibé ema ida-idak – wainhira hili atu tuir Evangelho – hili nia an rasik. Lakon tiha nia an rasik no hetan nia an rasik. Experiência hatudu ida ne’e: no acontece nune’e duni.

     Tanba ne’e mai ita reza ba foinsa’e sira; no ita reza atu ita bele sai Igreja ida nebé la precisa osan eh nia an rasik, maibé Maromak nia Reino no Nia justiça. Igreja ida nebé, hanesan Clara de Assis, iha aten-brani atu moris oin seluk iha cidade ida. Ida ne’e mak fo esperança!

[Amu Papa cumprimenta peregrino sira husi rai no lian oi-oin]

Texto Original:

https://www.vatican.va/content/leo-xiv/it/audiences/2025/documents/20251004-udienza-giubilare.html

Traduz husi: Zeferino Mesquita Almeida

Kona ba "Timor oan - Maromak oan"