FESTA BATISMO NA’I NIAN

Maun-alin no feton doben sira,

Wainhira Maromak tama iha (ita nia) história, Nia mai hasoru ema ida-idak nia moris ho fuan nakloke no haraik-an. Nia buka ita nia maneira haré ho Ninian, be nakonu ho domin, ko’alia ho ita hodi hatudu Liafuan salvação nian. Maromak Oan halo-An ba ema hodi fo possibilidade kmo’ok ida ba hot-hotu, nebé inaugura tempo foun ida be ita la hein, maske ba profeta sira.

João Batista hatene kedas ida ne’e hodi husu ba Jesus: «Ha’u mak iha necessidade atu simu batismo husi O, tansá O mak mai fali ha’u?» (Mt 3,14). Ho roman be iha nakukun laran, Na’i hatudu-An duni iha fatin nebé ita la hein: Santo ida iha sala-nain sira leet, nebé hakarak moris iha ita leet hodi la halo distância, uluk-nanain Nia halo hotu kedas buat nebé ema halo to’o rohan. Jesus hatán ba João katak, «agora husik lai ba, di’ak liu ita halo tuir justiça hotu» (v. 15). Justiça ida nebé? Maromak nian, nebé iha Jesus nia batismo hala’o mos ita nia justificação: iha Nia laran-luak rohan-laek, Aman halo ita hamutuk liu husi Cristo, Maksoin ida de’it ba ema hotu. Oinsá mak ida ne’e bele acontece? Ida be simu batismo husi João iha Jordão halo gesto ida ne’e sai tiha sinal foun husi mate no moris-hi’as, perdão no comunhão. Ida ne’e mak Sacramento ida be ohin ita celebra ho imi nia oan sira: basá Maromak hadomi sira, sira sai sarani, sai ita nia maun-alin no feton sira.

Imi nia oan sira be oras ne’e imi ko’us daudaun sei sai criatura foun. Hanesan mos imi inan no aman sira uluk simu moris ne’e, nune’e mos sira agora simu sentido ida ne’e atu moris: fiar. Wainhira ita hatene katak buat di’ak ne’e essencial, ita sei buka kedas atu fo ba ema hirak be ita hadomi. Ema nebé mak husik hela nia oan be foin moris la ho roupa eh hahán, hodi hein atu oan rasik mak hili oinsá atu hatais no oinsá atu han wainhira boot mai? Belun doben sira, karik hahán no hatais sira necessário ba moris, então fiar ne’e liu tan ida nebé necessário ne’e, basá ho Maromak mak moris ne’e hetan maksoin.

Nia domin be providencial hatudu-an iha rai liu husi itaboot sira, inan no aman sira nebé husu fiar ba sira nia oan. Sei to’o mai tempo ida nebé sira sei sai todan atu imi ko’us iha imi liman; no sei to’o mos loron ida nebé sira mak sei tulun imi. Batismo – nebé halo ita hamutuk iha família ida de’it iha Kreda – hasanto nafatin imi nia família, haraik kbi’it no constância ba domin nebé halo imi hamutuk ona.

Gesto sira be la kleur tan ita sei halo ne’e nu’udar sasin kmo’ok husi ida ne’e: bee husi bee-matan ne’e nu’udar Espírito be fase, be purifica husi sala sira hotu; hatais mutin ne’e nu’udar hena foun, nebé Aman Maromak haraik mai ita ba festa rohan-laek iha Nia Reino; lilin be lakan husi Lilin Páscoa nian ne’e nu’udar roman Cristo Moris-hi’as nian, nebé haroman ita nia dalan. Ha’u hein katak imi bele continua haksolok ho tinan be foin hahú ne’e no ba moris tomak, no fiar ba katak Na’i sei acompanha nafatin imi nia hakat sira.

(https://www.vatican.va/content/leo-xiv/it/homilies/2026/documents/20260111-battesimo.html)

Kona ba "Timor oan - Maromak oan"