[TETUN] SANTO PADRE NIA HOMILIA IHA MISSA DOMINGO BA DALA-XV, TEMPO COMUM

Maun-alin no bin-feton sira:

     ha’u fahe ho imi ksolok hodi celebra Eucaristia ida ne’e no ha’u hakarak cumprimenta hot-hotu be iha ne’e, comunidade paroquial, na’ilulik sira, Bispo Diocese ida ne’e nian, Eminência, autoridade civil no militar sira.

     Evangelho Domingo ida ne’e nian be ita foin rona, nu’udar aiknanoik furak ida nebé haktuir husi Jesus. Ita hot-hotu hatene aiknanoik kona ba Samaritano di’ak (Lc. 10,25-37).

     Ohin aiknanoik ida ne’e continua nafatin desafia ita, sadik ita, book ita nia dukur hakmatek eh ita nia hanoin distraído sira no provoca ita atu hasoru risco fiar nian nebé he’in los de’it, halo tuir los de’it regra exterior sira maibé la iha capacidade atu sente no halo hanesan Maromak nia Futar-Fuan laran-luak.

     Neon-monu (compaixão) mak sai hanesan centro ba aiknanoik. Karik loos duni katak Evangelho haktuir dehan neon-monu ne’e hanesan hahalok husi samaritano nian, então buat dahuluk nebé importante mak hateke. Loos duni katak, iha ema ida be kanek todan latan hela iha dalan ninin hafoin hasoru ema na’ok-tén sira be assalta nia, na’ilulik no levita ida liu, Evangelho haktuir: “hateke ba nia no la’o liu tiha” (v. 32); maibé samaritano ne’e, Evangelho dehan: “nia hateke ba no sente neon-monu” (v. 33).

     Maun-alin no bin-feton doben sira, hateke ne’e mak halo diferença, basá hatudu saida mak iha ita nia fuan: bele mos haré no la’o liu tiha eh haré no sente neon-monu. Iha maneira ida atu haré iha liur de’it (exterior), distraído no la preocupa, haré ida nebé halo finge la haré, katak lakohi atu sibuk no lakohi atu situação ne’e book ita; no iha mos haré ida ho matan fuan nian, hateke ho kle’an liu, ho empatia ida nebé halo ita tama iha ema seluk nia situação, halo ita participa interiormente, book ita nia fuan, halo ita la hakmatek, questiona ita nia moris no ita nia responsabilidade.

     Hateke dahuluk ida be aiknanoik hakarak ko’alia mai ita ne’e mak ida be Maromak nian mai ita ne’e, atu nune’e ita bele aprende hodi hetan Maromak nia matan sira, be nakonu ho domin no neon-monu ba ema seluk. Bele dehan katak, Samaritano di’ak ne’e nu’udar imagem Jesus nian, Maromak Oan be Aman Maromak haruka mai iha história tanba Nia hateke ba humanidade ida ne’e no la la’o liu de’it, ho matan, ho fuan no Futar-Laran ho emoção no compaixão. Hanesan Evangelho haktuir ema be tun husi Jerusalém ba Jericó, nune’e mos humanidade tun ba mate laran, ohin loron mos dalabarak ita tenke hasoru buat aat nia nakukun, liu husi terus, ho kiak, ho absurdo mate nian; maibé Maromak hateke mai ita ho compaixão, Nia hakarak atu sai Dalan mai ita, Nia tun mai hamutuk ho ita, liu husi Jesus, samaritano di’ak ne’e mai cura ita nia kanek sira, kose nia mina domin no laran-luak nian mai ita.

     Amu Papa Francisco fo hanoin beibeik mai ita katak Maromak ne’e laran-luak no neon-monu, no dehan katak Jesus “nu’udar Aman Maromak nia compaixão mai ita” (Angelus 14 julho 2019). Jesus mak samaritano di’ak be mai hasoru ita; Santo Agostinho dehan katak, Jesus “hakarak hakbesik-An mai ita. Basá Na’i Jesus Cristo rasik mak representa Nia-An liu husi ema ida be tulun ema kiak be monu iha dalan, kanek, besik atu mate no na’ok-tén sira so’e hela” (A doutrina cristã, I, 30.33).

     Hafoin ita bele comprende tanba sá mak aiknanoik ne’e desafia ita ida-idak: basá Cristo mak manifestação husi Maromak be laran-luak, tanba ne’e, fiar iha Nia no tuir Nia nu’udar discípulo ne’e katak husik ita nia an atu transforma, nune’e ita bele hetan mos sentimento nebé hanesan ho Nia: fuan ida be book-an, hateke ida nebé la la’o liu de’it, liman rua be tulun no halo kman kanek sira, kabás forte sira be lori todan ema hirak be precisa ne’e nian.

     Leitura dahuluk ohin nian halo ita rona Moisés nia liafuan sira, dehan mai ita katak halo tuir Maromak nia ukunfuan sira no fila ba Nia ne’e la’os katak halo barak liu tan hahalok exterior sira, maibé, fila ba ida-idak nia fuan, hodi descobre katak iha nebá mak Maromak hakerek Nia ukunfuan domin. Karik iha ita nia moris ita descobre katak Cristo, nu’udar samaritano di’ak, hadomi ita no tau-matan mai ita, nune’e mos dudu ita atu hadomi ho dalan be hanesan no ita sei sai compassivo hanesan Nia. Cristo tau-matan no hadomi ita, ita mos sei sai sinal husi Nia domin no nia compaixão iha mundo.

     Maun-alin no bin-feton sira, ohin loron ita precisa revolução domin ida ne’e. Ohin loron, dalan ida be tun husi Jerusalém ba Jericó, cidade ida be besik ba tasi, sai tiha nu’udar dalan ida ba ema sira be mout iha buat aat, mout iha sofrimento no iha kiak; nu’udar dalan ba ema barak be simu todan no kanek sira iha moris ne’e; nu’udar dalan ba ema hotu be tun to’o lakon sira nia an; no sai nu’udar dalan ba povo sira be lakon buat hotu, povo ida be ema naok no assalta, vítima ba sistema político opressivo, vítima ba economia ida nebé condena sira ba moris kiak, ba funu ida be oho sira no sira nia mehi no sira nia moris.

     No ita atu halo saida? Ita haré no la’o liu tiha, eh ita sente neon-monu hanesan samaritano ne’e? dalaruma ita fo ksolok ba an de’it hodi halo ita nia dever eh considera ita nia belun mak hirak be besik ita ne’e de’it, nebé hanoin hanesan ita, nebé iha nacionalidade ho religião hanesan ho ita. Maibé Jesus muda perspectiva hodi apresenta mai ita samaritano ida, estrangeiro gentio ida nebé hakbesik ba ema be kanek ne’e. No husu mai ita atu halo mos nune’e.

    Amu Papa Bento XVI hakerek dehan samaritano ne’e “la husu la husu nia dever solidariedade ne’e atu to’o iha nebé eh atu halo oinsá hodi hetan moris rohan-laek. Buat seluk ida mak acontece: nia fuan-rahun […]. Karik mosu mahusuk: ‘Samaritano ne’e mos ha’u nia belun?’, ho situação nune’e, resposta mak ‘lae’ ida nebé la claro. Maibé Jesus muda questão ida ne’e: samaritano be nu’u estangeiro mak hatudu uluk nia-an nu’udar belun no hatudu mai ha’u katak, hahú husi ha’u nia laran, ha’u mos tenke aprende atu habelun hodi lori resposta iha ha’u nia an. Ha’u tenke sai ema ida be hadomi, ema ida be ho fuan nakloke ba ema seluk nia necessidade” (Jesus de Nazaré, 253).

     Haré no la la’o liu de’it, hapara ita nia preocupação sira, husik atu ema seluk nia moris, atu nia ne’e se de’it, nia terus no necessidade sira bele book ha’u nia fuan. Ho ida ne’e mak halo ita hakbesik ba malu, harí fraternidade loloos, harahun muro no barreira sira. No ikus mai, domin ne’e fo fatin no sai forte liu buat aat no mate.

     Belun sira, ita hateke ba Cristo Samaritano di’ak no ohin ita rona nafatin Nia lian be dehan mai ita ida-idak: “Ba no o mos halo nune’e” (v. 37).

Texto original:

https://www.vatican.va/content/leo-xiv/it/homilies/2025/documents/20250713-omelia-castelgandolfo.html

Traduz husi: Zeferino Mesquita Almeida

Kona ba "Timor oan - Maromak oan"